Ang Bagsik ng Super Typhoon Yolanda

Napaka-mapinsala ng nagdaang bagyong Yolanda. Hindi na ako nagtataka kung bakit ganun na lang kalala ang pinsalang idinulot ng bagyong nabanggit. Ayon sa mga eksperto, ang Super Typhoon Yolanda ay ang pinakamalakas na bagyong tumama sa kalupaan sa kasaysayan. Sa totoo lang, hindi na bago ang ganitong sakuna sa Pilipinas. Taun-taon ay mahigit sampong bagyo ang direktang tumatama sa ating bansa. Ngunit ano nga ba ang ginagawang solusyon ng ating pamahalaan?

Sa tuwing may sakuna gaya ng bagyo, ay kalunos-lunos ang eksenang tumatambad sa mga balita. Nagkalat ang mga patay na tao, hayop at ang kapaligiran ay mistulang inabuso. Ang kasunod na eksena ay ang pagbibigay ng mga “relief goods”, mga panawagan ng donasyon at ang pagdalaw ng Pangulo ng bansa. Tila ay paulit-ulit na lang ang ganitong kasaysayan sa Pilipinas. Hindi ba maaring bigyan ng permanenteng solusyon ang problema sa bagyo? Ayon sa ulat ay labis na pinsala ang tinamo ng Tacloban at ibang lugar na direktang tinamaan ng Super Bagyong Yolanda. Maging ang mga silid sa paaralan na ginawang evacuation ay nasira. Hindi ba pwedeng paghandaan na ang mga bagyo bago pa man ito dumating? Nais ko sanang imungkahi ang mga sumusunod sa pamahalaan:

1. Magpagawa ng matitibay na multi-purpose na gusali sa bawat baranggay sa mga probinsyang madalas daanan ng bagyo.
2. Maging bahagi sa curriculum ng elementarya at sekondarya ang basic life and survival technique. Turuan ang mga taong lumangoy dahil ang Pilipinas ay madalas binabagyo at binabaha. Makakaiwas din ang mga tao sa pagkalunod kapag may aksidente sa dagat.

Kapag walang ginawang solusyon ang pamahalaan ay patuloy na mauulit ang mga pangyayari kapag may Bagyo. Magbabago lang ang mga pangalan ng biktima, lugar ng pangyayari at ang petsa ngunit ang resulta ay iisa- pagkawala ng buhay, pagkawasak ng ari-arian at ang pagbangon para lang sa susunod na taon ay muling malugmok.

Mag-iwan ng puna